نبذة عن قصتي الشخصية عن تجربتي مع مرض سرطان الثدي و شعوري و رسالة لكل مريض
اسمي سلمى علي محمدعندي ٣١ سنةانا وحيدة اهلي و تعرضت لإبتلاءات كتير في حياتي بس كنت دايما واثقة ان ربنا هيعديني منها و هطلع اقوى.. اتجوزت و انا عندي ٢٤ سنة و انفصلت بعد ٦ شهور من الجواز الحمدلله خرجت منها شارية نفسي و اهلي و مستقبلي.. تعرضت لإهانات و تساؤلات كتير من المجتمع بس مكنتش بسمع لحد ولا بخلي كلام الناس يأثر فيا لإني عارفة انا ايه و ربنا عارف و ده كفاية..ربنا عوضني بزوج صالح محترم الحمدلله و ابن اصولو يشاء ربنا انه يبتليني مرتين في إجهاض في الشهر التالت..دايما واثقة ان كل اللي ييجي من ربنا خير حتى لو صعب علينا..الحمدلله ربنا عوضنا ب "ليال " ️ ..
شهر ٩ 2019 قبل عيد ميلاد ليال بشهر بالظبط عرفت اني عندي Breast Cancer مرحلة تالتة و لازم ابدأ علاج فورا و الموضوع مش هيستحمل تأجيل
كانت فترة صعبة و كلها مشاعر متلخبطة و مش عارفة هتخلص على ايه.. بس المفتاح دايما كان الرضا ️اخدت عهد على نفسي اني مش هضعف و هكمل و هعدي.. و هعمل كل اللي اقدر عليه عشان اقدر افيد اكبر عدد من الناس و انقلهم تجربتي يمكن اساعد حد حتى و لو بطاقة ايجابية..بدأت اعمل فيديوهات توعية عن المرض و عن تجربتي معاه و عن مواضيع تانية كتير في حياتنا لإني بكتب من زمان فا بدأت احوّل كتاباتي لفيديوهات..
الحمدلله خلصت جلسات الكيماوي و الاشعاعي و دلوقتي ماشية على كورس كيماوي حبوب..وكل ما الخوف يحاول يقرب مني بفتكر كرم ربنا و رحمته وبكون واثقة انه مش هيخذلني ابدا
رسالتي لكل المحاربين ماتخلوش الخوف يتملك منكم
الحاجة الوحيدة اللي صوتها أعلى من الخوف هي اليقين خلي ايمانكم في ربنا يحارب الخوف
التعليقات