Major Loss

مابعد الفراق وتغيير الحال في لحظة كدا إحساس مُرعب فكرة إنك تفقد شخص عزيز عليك و لسبب من الأسباب مبقاش متاح احساس مؤلم بجد وبيجبرك غصب عنك تخضع للتغيير

إنتهاء علاقتك بحد واحدة من ما يسمى Major loss .. حالة فقد كبيرة .. أزمة حياتية كبيرة.

وخاصة لو كانت علاقتك بيه فيها استثمار عاطفي ونفسي كبير .. اتعمل فيها مجهود .. واتبنى عليها توقعات إنها مُستمرة بجانب الخسايرالإجتماعية ..

أو العُمر زي ما ناس كتير بتقول ..

ضيعت عمرك أو حياتك إلخ..

أياً كان سبب الإنتهاء ومين اللي انهاها ..

حالة ما بعد الفقد معروفة .. هد .. كتير من الآلم والغضب والحزن والتمني والتشوش والحيرة واللخبطة .. هنمر بيها كلنا.. مراحل للحدادعلى الفقد .. بيكون طولها وشدتها حسب أهمية العلاقة ومُدتها وحسب الجروح النفسية اللي حصلت لينا ..

والسمة العامة البحث عن closure أو سبب للي حصل يمكن يهدي قلبك أو يريحك .. كتير جداً من الأسئلة ..ليه وازاي..وفين الغلط..وإيه اللي عملته غلط وإيه اللي كان لازم يتعمل وإيه اللي كان لازم ميتعملش..

كتير من الشكوك بخصوص الذات..

هو ازاي ماتشفتش ازاي متقدرتش ازاي متمش احترام مشاعري ..ازاي اتخانت ثقتي ... لو احنا مانستهلش مين يستاهل وغيره من الأسئلة اللي لا حصر لها ..

كتير من المخاوف بخصوص بكرة .. الخوف

الخوف من ضياع حياتنا الخوف من الفشل

الخوف من تكرار نفس الآلم ..

الخوف منعرفش نبقى كويسين تاني تفضل عايش في loop من التفكير هل المفروض أحافظ على مشاعر الناس و أديهم الثقة ولا أحافظ على نفسي ومشاعري ما إنت لما فكرت في الناس قبل كده محدش أخد على دماغه غيرك و ينتهي التفكير بتنهيدة حزينة عاجزة عن تغيير الوضع جواك ..

بعد التجربة ..

الناس بتمشي في طرق عشان تتخلص من الآلم ..اللي بيحاولوا جاهدين يرجعوا اللي فات ..

أو ينتقموا من اللي فات واللي بيقرروا ينسوا اللي فات بعلاقات تانية .. واللي بيقرروا يكملوا حياتهم من غير ما يراجعوا نفسهم فاللي فات بيقفلوا على اللي حصل وخلاص .. وفيه اللي قرر يقف مع نفسه .. يراجع العلاقة و أداؤه و دوره ومسئوليته فيها .. ويغير حياته بجد .. يتعافى يبدأ رحلة التعافي مهما كانت هتاخد قد إيه .. الآلم صعب مؤلم .. بس الاختيارات الاولى للهروب منه .. اما بتخلينا منتحركش منه مستنين حد يرجع ويطلعنا منه .. اوبنهرب منه بالتشويش عليه وندور على حد تاني يكون بديل يخلصنا منه .. الغاءه بـ مُسكِنات اول ما تروح يرجع تاني .. أو المُجازفة بإنك تكمل حياتك بدون ما ترممها .. الحِداد المؤجل .. الحُزن المؤجل ..

الآلم برغم قسوته .. ممكن يكون فُرصة تعافي فرصة عظيمة لمواجهة الذات وإصلاح عيوبها وافكارها وتصوراتها غير المنطقية وغير الواقعية ..عن النفس والآخر والحياة والتوقعات والمخاوف والأحلام ..

الآلم برغم قسوته فرصة للتغيير إنك تكون دايماً الأفضل من نُسخِتك إنت ، تعيش الحياة اللي كنت بتحلم بيها وتحصل على الاشياء اللي تستحقها يمكن عمرنا ما كنا هنعيد التفكير في حياتنا وانفسنا وكل شيء مرتبط بينا ومقتنعين به وكل شيء حوالينا - الآلم برغم ان احنا مكناش نتمنى يحصلنا إلا إنه القلم اللي بيفتح عيونا من جديد وبيخلينا نشوف كل حاجة من جديد.

مترفضش الآلم أو تكرهه محتاجين نستقبل الضيف اللي حامل رسالة مهمة لينا ونسمع ونفهم هو عايز يقولنا إيه.. محتاجين نقبل وجوده ونسيبه ياخد وقته لحد ميبقاش عنده حاجة يقولها تاني ، وجوده برغم قسوته مُهم وله وظيفة مهمة ، الآلم ممكن يكون بيفككنا ويطحنا عشان نلم ونتكون أشخاص جديدة..🖤