متلازمة ستوكهولم هي إن الشخص اللي إتعرض لأذى أو تم إختطافه أو تهديده أو حتى محاولة قتلة ، بتتكون عنده ردة فعل غريبة تجاه الخاطف أو القاتل ، وإظهار مشاعر
تخيل معايا إن طفلة عمرها ١٠ سنين اسمها ناتاشا تتخطف وهي في طريقها للمدرسة والخاطف يفضل حابسها في غرفة تحت الأرض وتستمر فترة خطفها لمدة ٨ سنوات كاملة مع فشل قوات الشرطة في إيجادها ،وبعد نجاتها وإنتحار الخاطف تتصرف ناتاشا تصرف غريب جدا
بإنها تستمر في البكاء على موته وتشعل شمعة في مكان دفنه!
إزاي ممكن حد يتكون عنده مشاعر تعاطف أو حزن تجاه شخص أذاه أو كان بيحاول يقتله أو خطفه ٨ سنين؟!
طبيب نفسي وباحث في علم الجريمة اسمه نيلز بيجيروت، لاحظ سلوك مشابه وردات فعل مماثلة لحالة ناتاشا ، وأطلق على السلوك دا متلازمة ستوكهولم
وهي إن الشخص اللي إتعرض لأذى أو تم إختطافه أو تهديده أو حتى محاولة قتلة ، بتتكون عنده ردة فعل غريبة تجاه الخاطف أو القاتل ، وإظهار مشاعر تعاطف وتعلق من الضحية تجاه الخاطف
تم تفسير الظاهرة دي بكذا طريقة
واحد من التفسيرات دي هي إن الضحية او الشخص المعرض للأذي بيتعامل بغريزة البقاء اللي موجودة فيه ، واللي بتخليه يظهر ود وتلطف بشكل حقيقي أو خادع للشخص اللي بيأذيه عشان يبعد عنه الأذى دا ويحاول يكسب تعاطف الخاطف مثلا وفي الحالة دي يضمن الضحية نجاته
لكن النظرية دي مفسرتش ليه التلطف والود دا بيستمر حتى بعد حدوث النجاة فعلا أو موت الخاطف زي في حالة ناتاشا؟
في تفسير تاني قال إن في بعض الحالات لما الضحية بتتعرض لحادثة أيا كانت نوعها وبتتعرض لخوف وتهديد ورعب ، العقل بيبدأ يخلق مبررات ويفكر أكتر في أسباب ومباديء الشخص اللي بيأذيه ويكررها على نفسه ويقنعها بالمباديء والأسباب دي ، وبالتالي بعد ما كان خصم للشخص مصدر الأذي يتحول لمناصر ليه ولأفكاره وأسبابه وكمان مقتنع بيها وموافق عليها
ودي ألية بيلجألها عقل الضحية عشان يخفف الشعور بالخوف أو التهديد أو بالرعب
أنا كنت خايف وعايش في قلق لأن فلان بيأذيني ، دلوقتي أنا مش خايف ولا قلقان لأني أقتنعت وحبيت أفكار الشخص دا وعقلي أقنعني إنها مبررات وأفكار صحيحة
في محاولة كمان لفهم متلازمة ستوكهولم، هي إن لما نمط حياتك المرفهه- السعيد- السوي بيتحول لنمط ظلم -وخوف -وقلق نتيجة الأذى اللي بيحصلك من شخص معين
دماغك بيتأقلم إن هي دي حياتك الجديدة والعادية ، الخوف والقلق والرعب
وبالتالي مجرد تقديم الأكل ليك عشان تفضل حي أو التهديد بالأذى أو بالقتل وعدم تنفيذ التهديد دا و عدم قتلك ومنحك فرصة إنك تعيش يوم كمان ، بيترجم لمخك إن دا منحة من الشخص المؤذي ليك وإنك لازم تشكره على عدم قتلك أو تشكره إنه قلل جرعة عذابك
شروح وتفسيرات كتير لكن عمرها ما هتنفي غرابة سلوك الأشخاص المصابين بمتلازمة ستوكهولهم ، وعمرها ما هتخليك تبطل تتعصب على صاحبك اللي متعلق بشخصية بتأذية وبتضره ومع ذلك متمسك بيها ومش بيرضى أبدا يبعد عنها ومصمم يفضل يتعرض للأذى دا
يعني
زي ما بيقولوا القط بيحب خناقه
هتفضل متلازمة ستوكهولم سلوك مش مفهوم وهنفضل نشوف نماذج حوالينا بتكرر نفس النمط الغريب دا، جايز نقدر نساعده
وجايز ينضموا لجيش القط اللي بيحب خناقه
التعليقات
المتلازمة دي كل نعاني منها في وقت من حياة لما نلاقي اعذار لاشخاص بمجرد انحنا مش حابين نخسرهم رغم انهم بيجرحو او يخربو حياتنا بطريقة غير مباشر