ما لازم تيأس الدنيا ما بتوقف عند مرض بدك تسعى لحتى توصل لأحلامك المرض بروح بإذن اللّه بس أحلامك إذا راحت من وين تجيب عُمر جديد لحتى تحققها ؟
أحلام كبيرة ما بتنعد فجأة كلها تحولت من أحلام بتنبض بالحياة لخوف من إمكانية تحقيقها والسبب بسيط جداً هو ( كورونا ) ..
بتمر عليك أوقات كثير ما بكون إلك نفس تحكي ولا تتحرك لأنه بإختصار بهالوقت بالذات الايماءات صارت بدّخلك بدوامه متعبه وحتى مجرد التفكير بصير عبئ عليك مو هامك اشي بس المهم كيف تحاول انه ينتهي يومك بسلام بعيدا عن ضجيج هالعالم بتحاول تفهم انه شو في ليش هيك بصير معك معقول هالحياه تتعبك وتاخدك لمطرح مش مكانك ولا شو مخبيلك القدر ؟
مع العلم انه الكل هالفتره بمُر بنفس المشاعر والأحاسيس على الأغلب بسبب الجائحة يلي عم بنعيشها وبنحاول نتأقلم معها بطرية أو بأخرى ..
بتسأل حالك ليش مش واضح اشي قدامك كل يلي عم بتشوفه مجرد سراب مع أنه أحلامك كبيره بس في بداخلك نغزه بتخوفك دايما من ولا شيء هيك بس خوف والسبب بسيط ما حدا عم يفهم عليك أنت شو بدك حتى انت نفسك ك إنسان مو فاهم انت شو بدك ؟
وهو جد انت شو بدك ؟
وهيك بتمر معظم أيامك وانت مش حاسس ولا منجز ولو اشي بسيط من السلم يلي ممكن يوصلك لحلمك بس رغم كل شيء في مقابل هالنغزه صوت انه وقف أنجز اعمل اتحرك ما تظل هيك مثل الجمادات بس برضه بتحكي لسا معي وقت مع أنه العمر بمضي وإحنا بنكبر بس بتظل خايف من كل شيء عم بصير حواليك بترجع بتحط ايدك على خدك وبتصفن بالناس لقلال يلي لسا أملهم كبير وبتصفن بالعالم يلي عم بعيش جائحه كبيره وبتدعي من قلب يرجع كل الروتين القديم وما بدك اشي من هالدنيا إلا السلام النفسي والرضى لأنك بتكتشف انه روتينك الإعتيادي يلي كنت عايشه هو أكبر نعمه وبتحكي الحمد للّه وبتدعي من قلبك انه يرجع العالم مثل أول وأحسن لأنه تعبت ومليت من قعدتك على أعصابك كل يوم لحتى تسمع موجز الأخبار وتعرف عدد حالات المرضى على أمل ما تلاقي ولا حاله بس بترجع بخيبة أمل كبيره وبترجع وبتحكي الله كريم واملنا باللّه أكبر من كل شيء بالدنيا والفرج قريب بإذن اللّه وبكره أحلى ...
تيماء صمادي
التعليقات
مبدعه دايما تيماء حبيبتي بالتوفيق