80,000 ساعة: كيف أختار مساري الوظيفي؟

***80 ألف ساعة: هو مجموع الساعات التي يقضيها الإنسان العادي في حياته في الشغل***

هذه المدونة تختلف عن باقي المدونات اللي كتبتها، حيث أنني أطلب منك، عزيزي الباحث عن الإلهام، التفاعل الايجابي مع محتويات المدونة حتى أستطيع أن ألهمك. وأبدأ بأن أطلب منك الجلوس في مكان هادىء لوحدك ووضع سماعاتك قبل أن تستمع الى هذا التسجيل القصير (دقيقتين ونصف).

"لو يرجع الزمن للوراء كنت عملت و سويت!"

من أشهر الجمل اللي بسمعها من الناس بداية من عمر العشرينات الى الثمانينات! الزمن هلا رجع فيكم وعندكم فرصة ثانية وقريبا رح تبدأوا بأطول رحلة في حياتكم، رحلة قطار الشغل، رحلة مدتها 80 ألف ساعة وهو مجموع الساعات اللي بيقضيها الانسان في حياته في الشغل. رحلة مهمة وطويلة، قد تكون ممتعة أو مزعجة.

رأيي الشخصي: احنا بنقعد نخطط قبل بشهر عشان رحلة عيد 3 أيام، فالأولى إنه نحط على الأقل نفس الجهد والوقت عشان نخطط لأهم رحلة في حياتنا! وأنا اليوم موجود عشان أشارككم ببعض النصائح حول المعايير الغلط اللي وقعت فيها والمعايير الصح اللي اتعلمتها لاختيار قطار الشغل الأنسب.

ونبدأ بثلاث جمل ممكن تشوش الاختيار وتضيع عليكم سنوات في القطار الخطأ.

1- إمشي ورا تخصصك

اخترت تخصص بالجامعة والآن ندمان؟ اكتبلنا في التعليقات شو التخصص اللي اخترته وشو التخصص اللي بتتمناه.

عادي جدا نلاقي ناس اختاروا صح وناس اختاروا غلط ، بس المشكلة لما يقرر الشخص اللي اختار غلط انه يشتغل بنفس مجال التخصص اللي ندم عليه. يعني عشان ما تضيّع ال 4 سنوات اللي فاتوا، مستعد تضيع ال60 سنة الجايين بنفس المجال؟! هذا خطأ مشهور في طريقة اتخاذ القرار اسمه مغالطة التكلفة الغارقة Sunk Cost fallacy، لما اكتشف اني بضيّع وقتي وجهدي في شيء ما رح ينجح، بضل ماشي بنفس الطريق عشان مستخسر الوقت اللي حطيته. مين حاليا مضيع جهده بشغله وهو عارف إنها ما رح تزبط؟ نصيحة: "اللي فات مات" وما تفكر في اللي فات، فكر في اللي جاي. وعشان ترتاحوا وما تحسوا بالذنب، 80% من أنواع الشغل ما بتتطلب شهادة بتخصص معين! يعني لو شو ما درستوا عندكم سوق شغل ضخم تختاروا منه، واسألوا الناجحين ورح تلاقوا انه بعضهم فعلياً ما بيشتغل بتخصصه. فامشوا ورا تخصصكم بس إذا كان مناسب إلكم.

2. إمشي ورا راحة بالك

بدك شغل ما فيه توتر ولا ضغط؟ أعطينا مثال في التعليقات عن شغل ما فيه ضغط ولا توتر

زمان كان في اعتقاد ان الضغط دائما سيء ولازم نتخلص منه. بس في الواقع إني أشتغل شغل ما فيه توتر بتاتاً هو شيء سيء برضه ويؤدي للممل والكآبة في النهاية. يوجد ضغط سيء وضغط إيجابي: أشتغل شغل أعلى بكثير من قدراتي رح يسببلي ضغط سيء. أما أشتغل شغل فيه تحديات مناسبة لقدرتي هو المكان المناسب اللي بيعطينا ضغط بس إيجابي.

3. امشي ورا المصاري

بدك تشتغل أي شيء بيطلع مصاري كتير؟ إذا شايف أن المصاري بتجيب سعادة أكتب كيف في التعليقات.

الجملة هاي عادة بيستخدمها الحالمين اللي بيتابعوا أكاونتات المشهورين على مواقع التواصل وبيتحسروا على حالهم وشايفين طريق السعادة هو المصاري! في الواقع، نسبياً صح، بس قديش المصاري بتجيب سعادة؟ خلال دراسة سألوا ناس قديش نسبة رضاهم عن حياتهم. تخيلوا إنه فرق السعادة والرضى بين اللي دخلهم 40 ألف دولار بالسنة واللي دخلهم 80 ألف دولار هو 0.5 نقطة: من 6.5 طلع ل 7 من 10. فالمصاري صح بتجيب السعادة بس مش بالحجم اللي احنا متوقعينه. طب شو إذاً اللي بيجيب السعادة أكثر من المصاري. شو المعيار الأساسي اللي رح يساعدني أركب القطار الصح؟ القطار اللي رح أعيش فيه 80000 ساعة من حياتي؟

الجواب: امشي ورا موهبتك

اكتشف الشغلة اللي انت شاطر فيها واشتغل في هذا المجال! إذا بتعرف شو موهبتك فاكتبها في التعليقات.

الموهبة هي طريقة تفكير أو شعور أو سلوك تلقائي بكون شاطر فيه وبحب أسويه. سؤالي: مين منكم موهوب؟ اكتبولنا في التعليقات. واللي مش عارف موهبته ممكن أساعدكم وانتوا قاعدين بمكانكم بدون ما تتحركوا تعرفوا موهبتكم خلال 20 ثانية.. اللي حاب يكتشفها يحضر الفيديو التالي

وزي ما حكيت بالفيديو، اللي صدّق أي كلمة فأنتم أكثر طيبةً من الآخرين! (محاضرة تيد إكس الكاملة في المصادر تحت) يا اخوان، ترى الموهبة مش شعوذة، أصبع إيدك وأصبع رجلك! الموهبة في آخر 30 سنة انعمل عليها دراسات كثيرة وتجارب وملاحظات. أكيد مش بدقة بعض العلوم الأخرى زي الطب والهندسة ولكن هذا أفضل ما لدينا الى الآن. واللي فعلا حابب يجرب اختبار خفيف لطيف عن المواهب اضغط هنا.

الحلو أنه يوجد لكل موهبة عدة مسارات وقطارات مناسبة، زي شو؟ زي اللي عنده موهبة القدرة على التحليل، فممكن يشتغل مبرمج، محلل اقتصادي أو سياسي في جريدة أو محلل مالي في بنك أو مستشار في شركة استشارات لتطوير أعمال الشركات التانية. موهبة ثانية: واحد بيعرف كيف يكسب الناس ويكسر حواجز معهم ويكون محبوب فبيركب قطار: المبيعات، العلاقات العامة، التمثيل وغيره، أو واحد بحس بالناس وبفهم على مشاكلهم وبيتعاطف معهم بصدق فبيقدر يركب قطار: الموارد البشرية، الاستشارات النفسية، خدمة العملاء وغيره.

الموهبة مش بس بعرف أرسم أو أغني أو رقصني يا جدع! الموهبة مرة تانية أي سلوك أنا شاطر فيه و بحبه! شوفوا قديش المتعة رح تكون خلال رحلة ال 80,000 ساعة! رح تكونوا متميزين وحابين تتعلموا وتتطوروا في مجالكم وحتى مرتاحين نفسياً أكتر. نصيحة امشي ورا موهبتك. وافضل طريقة انك تكتشف موهبتك هو انك تجرب وتطوع في أنشطة مختلفة لحد ما تلاقي المكان اللي إنت شاطر ومستمتع فيه! في أول 6 سنوات من حياتي العملية كنت راكب القطار الغلط وبعدين بالصدفة تطوعت مع إنجاز وأعطيت محاضرات معهم وقررت بعدها أركب القطار الأنسب لي، فأسست شركة إسمها علم الموهبة لتساعد الناس يكتشفوا مواهبهم ويحددوا أنواع الشغل الأنسب. صارلي حاليا 12 سنة راكب القطار الصح والحمد لله.

إذا فمعايير قطار الشغل الأنسب أولا أن يناسب موهبتكم وثانياً أن يكون فيه خدمة للناس وثالثاً أن تكون ظروف الشغل مناسبة.

طب السؤال الذي يطرح نفسه: أنا صراحة لسه ما بعرف موهبتي، ورح أتخرج قريبا وبدي أبلش شغل؟ للخريجين الجدد اللي ما بيعرفوا مواهبهم: وين أفضل قطار شغل يبدؤا فيه رحلتهم؟ النصيحة الأساسية: إركبوا قطار الشغل اللي رح يستثمر فيكم وفي تدريبكم. زي وين؟

1. في شركات ربحية عشان عندهم ميزانيات أكبر للتطوير وتدريب الموظفين. والاسهل أنكم لاحقاً تنتقلوا من شركة ربحية لشركة غير ربحية مش العكس.
2. في مجالات زي: الاتصالات، الاستشارات، التدريب، البنوك و المجالات الخدمية.
3. في شركة صغيرة بس بتكبر بسرعة ويكون مديرك منيح.

و المصاري مش أولوية في هاي المرحلة. ولا الشهادات الجامعية زي الماجستير والدكتوراة اللي تقريبا مش مهمة غير في المجال الاكاديمي أو اللي بده يكمل تدريس أو تعليم. الأهم تاخد شهادات ودورات متخصصة لطبيعة الشغل اللي انت بتشتغله زي ال CPA أو دورات البرمجة المختلفة أو دورات مبيعات.

الله يوفقكم جميعاً وإذا ألهمتكم هذه المدونة، بتمنى تتابعوا مدونتي وتضغطوا على زر : ألهمتني.

Resources:

80,000 Hours Book

80,000 Hours: How to Choose Your Career Path | Ahmad Al-Assad | TEDx PSUT