مناقشات علمية بالعامية المصرية عن تحقيق السعادة، انقلها لكم من خلال بعض تجاربي الشخصية وقراءاتي العلمية وبعض مما تعلمته وعَلِمته من دوائري المختلفة
ونروح لشبه الجزيرة العربية ... البيئة الصحراوية اللي بتميز شبه الجزيرة العربية، أثرت بشكل كبير علي الاشكال المختلفة لطقوس الرقص الشعبي الفلكلوري ... قلة المطر احياناً ... محدودية الزرع، وبالتالي طريقة التغذية والطبخ ... درجة الحرارة والمساحات الواسعة جداً ... وصفاء السما اللي بتسمح برؤية أكتر دقة للنجوم والاجرام السماوية ... انت في الصحرا مضطر طول الوقت تفكر بالأرقام والاتجاهات وإلا هتوه، ويمكن لو رجعنا لورا كتير ... هنلاقي انها أثرت علي المناسبات اللي كان بيمارس فيها الرقص الشعبي الفلكلوري، وبشكل عام اعتمد الرقص علي حركات قوية بالأرجل واستخدام طبقات الأصوات المختلفة والايقاع، سواء الحركي او الصوتي، مع استخدام العصا والخناجر والسيوف، لان كان معظم مناسبات الرقص احتفالات بالانتصار ورفع حماسة المحاربين. ورغم تطور الزمن، حافظت شبة الجزيرة العربية علي الهوية الخاصة لكل دولة، والرقصات الشعبية الخاصة بيهم ... وبقي الرقص موجود في الاحتفالات والافراح والمناسبات المختلفة... وكمان اتعمل مهرجانات مخصوصة للحفاظ علي التراث الفلكلوري، زي مهرجان "الجنادرية" في السعودية ... ومهرجان "زايد التراثي" في الإمارات ... ومهرجان مسقط في سلطنة عمان. ولو بصينا علي اشهر الرقصات الشعبية في السعودية، هنلاقي رقصة اسمها "العرضة" وهي رقصة جماعية حماسية، وليها أزياء معينة وبتستخدم فيها السيوف والخناجر... وفي كمان رقصة "المزمار" ودي رقصة من منطقة الحجاز، وبعد كدا انتشرت في مكة والمدينة المنورة وجدة، وبتتميز بإيقاعات سريعة وعادة بتبقي في الافراح... وفي كمان رقصة شهيرة اسمها "الدحة" ودي خاصة بمنطقة الجوف والحدود الشمالية، وبتبقي كدا زي صفين قصاد بعض من الرجالة بيحركوا اقدامهم وايديهم بإيقاع معين علي صوت الربابة.
وبصة كمان علي أشهر الرقصات الشعبية في الامارات، هتلاقي اشهرهم علي الاطلاق، رقصة "العيالة" ودي الرقصة الوطنية الأولي للإمارات وبيتقال فيها النشيد الوطني بمصاحبة السيوف والعصا ... وفي كمان رقصة "اليولة" ودي رقصة محببة جداً للشباب والأطفال، عشان كدا منتشرة برضه، ممكن تترقص بشكل فردي أو جماعي، وفيها اللي بيرقص بيرفع العصايا او السلاح لفوق بطريقة معينة وبعدين يلقفها تاني... وفي كمان رقصة "المالد" أو "المولد" ومشهورة قوي في المناسبات الدينية والافراح، وبتبقي زي صف كدا من الناس قاعدة ومعاهم طبول ضخمة بيحركوها بطريقة معينة في الهوا ويضربوا عليها تطلع نغمة معينة، وفي نفس ذات الوقت بتبقي في أناشيد دينية في الخلفية.
ونيجي بقي للجميل اللي لايق عليه الدلال ... سلطنة عمان ... تراث السلطنة للفنون المسرحية والموسيقي والرقص غني ومتنوع، ودا عشان التأثر بالفن الأفريقي وجزء من غرب آسيا ... انت متخيل معايا المزيج ... وبنشوف المزيج دا في اختلاف أنواع الطبول والرقصات اللي جذورها جاية من افريقيا وأكتر رقصة ليها شعبية في سلطنة عمان هي "رازا"، وفيها بيقف الرجالة في خطين كدا بيتبارزوا بالسيوف، وبيكون في شعر مقروء في الخلفية، والرازا من رقصات الحرب اللي بيستخدم فيها الطبول لتحفيز الراقصين... وفيه ٣ أنواع رئيسية للرقص العماني ... هما "العازي" و "اللاله" و "الوهابية" ... والقاسم المشترك في الرقصات، هو تعبيرها عن الشجاعة والرجولة والفروسية والترويح عن النفس وإظهار كرم الاخلاق والتمسك بجذور الهوية.
كلام جميل،تحمست وعاوز ارقص حالاً، قوليلي ازاي اعمل الرقص اليقظ بقي في البيت؟
طيب شوية كلام عن افريقيا طيب، مدام جبنا سيرة التنين، ميصحش كدا ... الرقص الافريقي دا، تقدر تقول انه مبقاش فن او حتي طقوس، دا بقي حركة ويمكن أداة تواصل ودفاع سلمي عن النفس ضد العنصرية والاقصاء والاستعمار ... والشعوب الافريقية وتحديداً جنوب افريقيا، كانت أول شعوب العالم معرفة بفنون الرقص الفلكلوري ... اللي هوا انتو لما كنتو رايحين يا جماعة احنا كنا راجعين ... دا غير ان حركات الرقص بتعبر بوضوح كبير عن طبيعة الافارقة وحياتهم ومعانتهم مع المستعمر... دا غير المزيج الفريد والعجيب من الألوان والفلسفة المرتبطة بحركات الرقص، سواء كان ليها علاقة بالسحر أو البعث أو شعائر العبور ... تقدر تقول كدا ان الرقص الافريقي له طابع طقوسي سحري، بيعكس طابع الحياة الافريقية ومش بينفصل عنها كفن مستقل، يعني بالبلدي كدا الافريقي بيتولد بيقول ماما وبابا بالرقص... بيعبر عن احتياجاته بحركات جسمه، عشان كدا الافارقة من اكتر الشعوب حباً لاجسامهم، وثقة في مظهرهم، ولا تقولي بقي دايت وبتاع ، انا حلوة وست الكل ... وهتلاقي الأطفال والكبار والستات والرجالة كله بيرقص، والرقص بيحصل في كل وقت وفي كل مناسبة، في الميلاد والموت والصيد والبلوغ ... وهذا يوضح لنا يا جماعة، قد ايه الافريقي فرفوش وعنده مناعه نفسية قوية، لان الرقص بيساعده علي تفريغ الضغوطات النفسية أول بأول، دا غير ان معظم رقصاتهم جماعية فبتساعد علي تجديد روابط الانتماء والدعم، وبتدي ثقة أكبر في الهوية الأفريقية.
التعليقات