الرقص اليقظ - ج١

مناقشات علمية بالعامية المصرية عن تحقيق السعادة، انقلها لكم من خلال بعض تجاربي الشخصية وقراءاتي العلمية وبعض مما تعلمته وعَلِمته من دوائري المختلفة

افتح شباك السعادة في البيت مع أسماء

كان الرقص في مصر القديمة هدفه في الأساس "التأمل الحركي" وتحقيق "التوازن" بين الجسد والروح ... بين الأمور المادية والأمور المعنوية ... بين الأمور الملموسة والأمور الغيبية ... عشان كدا كان فيه طقوس رقص لكل مناسبة... رقص وقت الزراعة والفلاحة عشان يشجع الفلاح علي الزراعة ... رقص وقت تشييع الجنازة عشان يخرج طاقة الحزن علي المتوفي ... رقص وقت الزواج عشان يعبر عن الفرحة ويشجع الزوجين علي بداية حياة جديدة ... رقص في الولائم والمناسبات الاجتماعية عشان يعمق الروابط الاجتماعية ... رقص وقت الحرب عشان يشجع الجنود والمحاربين علي الانتصار في المعركة، وغيرها من الأنشطة الحياتية اللي كان ليها الرقصة الخاصة بيها.

وخصوصية الرقص مش بس كان ليها علاقة بالأنشطة الحياتية، وانما كانت مختلفة حسب المنطقة، كل منطقة في مصر القديمة كان ليها طقوس الرقص المختلفة، ايوة طبعا كان في تشابه في المبدأ العام للرقصة، لكن في شكل مميز لكل منطقة ومجتمع... زي مثلاً في مصر القديمة في الجنوب، كان في رقص باستخدام العصا، اللي هوا دلؤتي اتطور وبقي اسمه "التحطيب" أو "عصايا المحبة" أو "غية الرجال" في صعيد مصر... في حين هنلاقي في المدن الساحلية، رقصات تانية زي "البمبوطية" واللي بتعبر عن الأنشطة اللي بيقوموا بيها الصيادين، والواقع الخاص بحايتهم ... وفي كمان عندنا رقصة "التنورة" واللي بتعكس فلسفة معينة للحياة، فيها نزعة روحانية فلكلورية... والتنورة في الأساس من الرقصات الإسلامية، ونشأتها كانت في تركيا، بس احنا ضيفنا عليها التاتش بتاعنا (الربابة و المزمار و الصاجات والابتهالات والاناشيد المصرية)... هتلاقي في دول عربية كتير وفي أوروبا كمان، تشابه بشكل ما في الرقصات، مع إضافة التاتش الثقافي بتاع كل دولة، زي ما عملنا في التنورة.

علي سبيل المثال، رقصة "الدبكة" أو "الديبيكا"، من الرقصات الفلكلورية الشعبية المشهورة في بلاد الشام والعراق والأردن وحتي كمان في شمال السعودية ... وزي ما قلت في اختلافات في الدبكة بين كل دولة والتانية، حتي كمان في الدولة الواحدة ... عندك مثلاً في الأردن فيه أكتر من ٢٠ نوع من الدبكة، بس كل الأنواع دي مشتركة في الروح الأساسية بتاعت الدبكة، وهي تشكيل صف علي شكل قوس او دايرة، وحركات الرجل والكتاف والضرب علي الأرض بقوة وصوت جهوري كدا.

ونروح علي المغرب... هنلاقي تنوع في الرقصات الفلكلورية اشهرهم، رقصة "الأحواش" والمرتبطة بألقاء الشعر ... ورقصة "أحيدوس"، ودي رقصة أمازيغية معناها الرقص الجماعي، وبيرقصوا فيها علي إيقاع آلة البندير... وفي كمان "الركادة" أو "العلاوي" وبتعتمد بشكل كبير علي الرشاقة والحركة السريعة.