واصبر فأن الله لايضيع أجر المحسنين .....لا تحزن ان الله معنا
ربنا مش بيضيع حد قلبه مليان أحلام وأمل وثقه وإيمان بيه لمجرد تأخر الحلم والسعاده والنصيب الحلو في الدنيا..!
ده المبدأ اللي بجدد بيه الروح العصيه بتاعتي كل يوم ، وأسكت تمردها علي القدر والواقع اللي بيمشي ببطء قاتل لأحلام منهكه وعلي وشك الإستسلام والانتهاء ، بحاول أقمع يأسها وضجرها من قسوة الأيام ، إعتراضها الدائم علي أمر قضاه الله بحكمه بغبائي لسه مقدرتش أوصل لها كان فيه حديث لعبد الله بن مسعود حطاه برواز في عقلي بيقول إيه بقي بيقول (لئن أضع جمرة في فمي حتى تنطفئ، أحب إلي من أن أقول لأمر قضاه الله تعالى: ليت الأمر لم يكن كذلك!) ، المؤمن القوي خير وأحب إلي الله من المؤمن الضعيف وفي كل خير إحرص علي ما ينفعك وأستعن بالله ولا تعجز وإن أصابك شئ فلا تقل لو إني فعلت كان كذا وكذا ولكن قل قدر الله وما شاء فعل...."
إحساس الإيمان ده انا مش بتكلم فيه كتير لأنه من النعم اللي ممكن تزول زي أي نعمه ربنا بينعم بيها على العبد وانا ربنا منعم عليا بنعمه الصبر والتحمل والتدبر وأجملهم التدبر وإدراك الحكمه ولو بعد حين ودي بتبقي نتيجه الصبر والتحمل....!
أوقات بقي ودي فطره إنسانيه لابد منها بنفتكر إن النعمه نقمه لسوء تقدير منا وبنتعامل معاها بشكل قهري مرهق ومبدد لدواخلنا في نفس الوقت ، ونقعد تقول ليه ياربي بنواجه ده ليه ياربي موصلتش لده ليه ي ربي محققتش ده ، مع ان الحكمه بتقضي في معظم الأحيان بعكس ذلك عكس ذلك اللي هو عكس فهمنا للأمور ونظرتنا ليها يعني ، وده اللي قالته الآيه الكريمه.... "وَمَنْ يُبَدِّلْ نِعْمَةَ اللَّهِ مِنْ بَعْدِ مَا جَاءَتْهُ" ، علشان كده علشان ندرك نعمه ربنا لازم نوصل للصبر ، الصبر ده بقي قصة تانيه خااالص مفتاح جميل جداا لأي حد بيسعي للوصول لوضع مرضي في حياته أين كان محتواه ودرجه رضاه ونعمه عظيمه ربنا بيبعتها للعبد ، السعي بعقل مرن يقبل الشقلبه والعقبات ويتنفس مع نهايه كل يوم هموم وثقل وهو بيقول بنفس راضيه الحمدلله أنا عارف ان ربنا هيجبرني ده بقي اللي هو " الصبر" ، ربنا لو بيزود الطريق صعوبه فده علشان يبقي الوصول ليه طعم ، يبقي ليه لذه كده الواحد بعد الضربه يقوم وكأنه خاد شاور ساقع فوقه ووضح الرؤيه والزغلله قدام عينيه شويه ، الأمور أدراكها بشكل أعمق وأحسن ميه مره عن ذي قبل ، ودي نعمه في حد ذاتها عظيييييمه جدااا جداااا ...!
كتير من اللي عانوا في طريقهم وحققوا نجاحات وإنجازات اتكلموا عنها في سردهم ، اتكلموا عن نعمه الألم والصعوبات والتعرجات ، أيوه انا بسميها نعمه ربنا بيبعتها للعبد اللي بيحبه وعايزه يبقي مختلف وناضج وتأكيد لكلامي الناس دي اتكلموا في نهايه طرقهم وكأنها وسام ليهم ولإيمانهم بأحلامهم وسام خلانا نأخدهم قدوة ونسقفلهم بجمله بحبها جداا.. (لولا الماضي الأليم لما كنا بكل هذا القدر من النجاح والعظمه)
يبقي نعمه القسوة والألم والماضي والصعوبات اللي وجهتها زمان إترجمت دلوقتي في خبرات عصرتك خلاتك تحس بلذه النجاح وبشغف كل معلومه حصدتها ودرجه صعدتها وماخدتش فيها مساعده من حد رغم انك كنت في أمس الحاجه للدعم العالم بأكمله ربنا هنا بيبقي عايزك مختلف عايزك تتسلق بمفردك علشان لما توصل تعرف الحكمه وتقدر وتساعد معاناه اللي مروا بنفس مواقفك وتمد ليهم ايدك عايزك تتدبر وتوصل للنتائج لوحدك مش تبقي أسير كتب واسلاف قديمه عايزك تكون مختلف بعقلك..!
يبقي تأخر الشئ مش معاناه إني تعيس وماليش حظ زي غيري ليك اربعه وعشرين قراط هاتخدهم كاملين متوزعين بالتساوي بين السعاده والحزن ، جايز حظك الحزن يسبق السعاده وجايز العكس وجايز دنيتك كلها حزن وسعادتك في الآخره حصاد صبرك وإيمانك وده الأعظم ...!
المهم خلوا ايمانكوا بربنا كبير كلنا هنفرح.....
التعليقات