بس أنا أبويا مقاليش

١٠ حاجات لازم تعلموهم لأولادكم وتزرعوهم جواهم من وهما صغيرين عشان متبقوش سبب في علامة هتسيبها إيد المتحرش في يوم على أجسامهم ونفوسهم.

من اكتر الحاجات المثيرة للإنتباه في فضيحة الانتهاكات الجنسية اللي قام بيها المجرم أحمد بسام زكي مؤخرا غير عدد البنات المهول اللي اتعرضوا للأذى بسببه وانه تقريبا تعدى على كل تاء مربوطة عدت عليه في حياته سواء بالتحرش أو الاغتصاب والابتزاز ان معظم البنات اللي افرجوا عن قصصهم المأساوية وعرضوها على الملأ إذا لم يكن كلهم استسلموا أو خضعوا لتهديدات وابتزاز المغتصب خوفا من الفضيحة، مواجهة الأهل أو كانوا أصلا صغيرين مش عارفين اللي بيحصل معاهم ده اسمه ايه! وده راجع لقلة التوعية والتثقيف من الصغر ويعتبر ده جزء كبير من أسباب زيادة ووحشية قضايا الانتهاكات الجنسية وسبب كبير لمعاناة معظم البنات وبطء تعافيها من أثار الجريمة دي. ساعدوا اولادكم واحموهم بالوعي والثقافة اللازمين عشان متبقوش سبب في العلامة اللي بتسيبها إيد المتحرش عليهم.

.- ثقفوا ولادكم وبناتكم وعرفوهم بحقوقهم وحدودهم اللي مينفعش يسمحوا لحد يتخطاها ومتتكسفوش عشان لما يتحطوا في موقف وميبقوش فاهمين اللي بيحصل معاهم لاهينفعكم ولاهينفعهم الكسوف.

- صاحبوا بناتكم وطمنوهم وازرعوا جواهم الثقة واسقوهم بالحب بدل الخوف ادوهم القوة يواجهوا لما يتعرضوا للمواقف دي وهما عارفين انهم لما يرجعوا يستنجدوا بيكم أو يحكوا اللي اتعرضوا ليه مش هيلاقوا لوم وغضب على حاجة ملهمش ذنب فيها (أهل كل بيت لازم يبقوا ضهر وملجأ أمان).

- علموهم ان البنت اللي بتواجه ومبتسكتش على أي انتهاك مش بنت بجحة ولا مستقوية دي بنت واعية وعارفه قيمة نفسها وحقوقها وعرفت تتصرف وده رد الفعل الطبيعي أصلا.

- علموهم ان البنت اللي بتتكلم في مشاكل بنت زيها وبتساعدها تجيب حقها دي بنت بتحس وبتفهم ومبتقبلش الظلم مش فيمنست معقده من الراجل وحطاه ف دماغها وعايزة أي مشاكل معاه.

- علمي بنتك ان لبسك، جسمك وشكلك مش سبب في اللي بتتعرضيله ومش مبرر لحد إنه يتجرأ عليك ويشوف حق لنفسه فيكي مش موجود والموقف ده انتي فيه صاحبة الحق والطرف التاني هو صاحب الفضيحة ويستاهل الوصم مش انتي.

- ربوا الولد على انه مش لازم يبقى عنده اخت ولا أم عشان يخاف ويحترم بقية البنات البنت مخلوق معاك في الدنيا وليه حقوق وعليه واجبات زيه زيك وطول مفيش أي رابط بينك وبين البنت دي محدده الدين والمجتمع يسمحلك تبقى في علاقة معاها برضا الطرفين فملكش أي مبرر في الدنيا تلمسها أو تبصلها عشان تثبت رجولتك الرجولة هي احترامك لنفسك وليها.

- علموا ولادكم ان معاكسة البنات أو النظر ليهم بشهوة مش علامة رجولة ولا دليل انه بقى جامد بالعكس ده شيء مؤذي ويقلل منه جدا.

- عرفوهم ان قبل مايعترضوا ويتريقوا على البنات اللي بتطالب بالمساواة أو بتحاول تحمي نفسها بتصدير الجزء القاسي منها يعرف انه لو احترمها وقدرها وكان مصدر أمان ليها احتمال ميشغلهاش كل ده وكل واحد هيقوم بدوره في هدوء.

- حبوا ولادكم حب مش مشروط حقكم لكن علموهم ان الدنيا ثواب وعقاب وعلموهم ان القرار والفعل اللي بيعملوه لازم يتحاسبوا عليه عشان يعرفوا حدودهم ويتحملوا مسؤلية نفسهم ومسؤلية اللي حواليهم.

- زودوا من صناعة الحملات الدعائية والمحتوى البصري والسمعي لتثقيف الناس وتوعيتهم وكل اللي عنده وسيلة يقدر يوصل بيها الرسالة ويساهم في الوعي يستخدمها لازم كلنا نرسم ونكتب ونغني كمان عشان ده دور مهم لينا في ان الرسالة توصل.

وأخيرا احنا مش في حرب ولا في غابة لو بقى عندنا الوعي والثقافة الكافيين وكل واحد عرف حقوقه وواجباته واحترم وجود مخلوقات غيره في الدنيا هتبقى أبسط وأهدى من كده.