ومن أغرب حالات الوفاة في العالم هاحكيلكوا عن شخصيات غريبة ماتت بطريقة أغرب
جت في دماغي كده احكيلكوا عن شخصيات غريبة ماتت بطريقة أغرب .. و روحت جبتلكوا كام واحد هاكلمكم عنهم واحد واحد..
أول شخصية هو فينسينت فان جوخ:
الرسام الهولندي العبقري إسمه كان علي إسم أخوه الكبير واللي إتولد ميت " ده أنا هاملا الpost أموات إنتوا لسه شفتوا حاجه
" وأصلاً إسم أخوه كان علي إسم جده.. فان جوخ كان مدمن كحوليات ومخدرات و ده كان سبب إنه يعاني من نوبات صرع شديدة بسبب مشاكل حصلت في مخه.. كان متحمس جداً للرسم لدرجة إنه كان بيقدر يخلص لوحات فنية صعبه جداً و معقده بسرعة رهيبه خالص وبعد مايخلصها يدخل في فترة إكتئاب طويلة وكمان كان ليه كتابات كتيره جداً بشكل مثير للشك حسب وصف الأطباء النفسيين.. هو كان مريض نفسي بس عبقري والأطباء قالوا إنه بيعاني من إضطرابات نفسية ثنائية ومن مرض مرتبط بالحالات الصرعيه.. الراجل ده رسم لنفسه 34 صوره ناس قالت انه غرور ولكن النفسيين قالوا ان ده سببه فقر عاطفي.. حاول أكتر من مرة إنه ينتحر.. قطع ودن من ودانه والمصيبة إنه أهدي ودنه دي لواحده اتعرف عليها
بس المصيبة الأكبر لو هي فعلاً أخدتها و استمرت في علاقتها بيه
،الحقيقة ماعنديش فكرة عن باقي القصة .. وفي النهاية وبعد محاولات كتير من الإنتحار نجحت واحده منهم عشان يرتاح و أكيد كانت الأخيرة!
الشخصية التانية جيروم آرفن جيروم:
كان خبير صحي إتخصص في أمراض القلب والشرايين.. كان بيقدم برامج علي التليفزيون ينصح فيها الناس ازاي يتجنبوا الأزمات القلبية والحقيقة كان واثق من انه هايعيش لحد مايبقي عنده 100 سنة وكمان هايموت بسبب حادثة عربية.. وصرح بالكلام ده في برنامج ليه.. مرة من المرات كان بيقدم حلقة علي الهواء و اتكل علي الله .. اه مات جاتله سكته قلبية وكان عنده وقتها 72 سنة، ماعرفش كان جايب الثقة اللي هو فيها دي منين !
تالت شخصية دي بقي هاتعجكوا أوي
إرنست هيمنغواي: صاحب الصورة في الموضوع..
أديب أميريكي حاصل علي جايزة نوبل للأدب وجايزة بوليترز .. يعتبر من أشهر كتاب العالم وأعلاهم سعرا ً،إرنست كان شخص غريب جداً حسب وصف الناس ليه اتعرف عنه إنه كان بيرفض يشتري هدوم جديدة وكان بيحب السفر جداً وكان بيخاف من التليفون!
و دايماً شايل تعويذه في جيبه.... واللي جاية دي أفظع.. كان مستحيل يكتب ولو حتي كلمة واحده يوم الحد
ماحدش عارف ليه .. شفتوا بقي إحمدوا ربنا علي النعمه اللي إنتوا فيها.. بس كان برده عبقري اشتغل في حياته غير الكتابة، صحفي في جريدة مشهورة اسمها star اشتغل في المخابرات الأمريكية.. وقت الحرب العالمية الأولي إشتغل سواق عربية إسعاف في الجيش الإيطالي.. و كمان إتجوز أربع مرات ً، و كان بيعاني من الإكتئاب و أدمن الكحوليات وفي مره أخد بندقية صيد كان باباه اهداها ليه وهو صغير وكان محتفظ بيها وبيحبها وقتل نفسه برصاصه منها !!
باباه واتنين من إخواته البنات ماتوا برده منتحرين وفيما بعد حفيده ليه إنتحرت و ده طبعاً مرض نفسي وراثي
الشخصية رقم أربعه كورت جودل:
عالم الرياضيات اللي اتوصف إنه أذكي العقول اللي عرفتها البشرية في مجال الرياضيات وقالوا إنه نابغه أكتر من فيثاغورث و إقليدس و نيوتن.. جودل كان صديق حميم لأينشتاين و كان شخصية صامته منطوية مايحبش الظهور حالته الصحية اتدهورت جداً بسبب وصوله لحالة تشبه حالات جنون الإضطهاد ، دايماً كان حاسس إن في حد عايز يموته إما بتسريب غاز سام مع الهواء من خلال التكييف أو إنه يحطله سم في الأكل و ده وصله إنه ماياكلش أي حاجه غير لما مراته تاكل منها الأول عشان يتطمن.. ولكن بعد وفاه زوجته توقف وأضرب عن الأكل تماماً لحد ما مات من الجوع في مستشفى الأمراض العصبية بعد فقدانه لكتير من وزنه وصحتة..
شخصيات غريبة جداً و عباقرة في نفس الوقت .. و طبعاً الضحك اللي في الpost مش استهانه أبداً بمرض الشخصيات دي ولكن لإضفاء روح خفيفة عليه عشان كله أحداث مؤسفه ..
التعليقات