كيفية التقدم على المنح؟

طرق التقدم على المنح للدراسة وحضور المؤتمرات والندوات الخارجية

انواع المنح؟
منح دراسية - بكالوريوس - ماجيستير - دكتوراة - تدريب - منح التعلم عن بعد - منح مالية وسفر - زمالات - مؤتمرات وندوات - جوائز - مسابقات - وظائف - تبادلات ثقافية – تطوع-

الفرق بين الماجستير والزمالة والبورد
الماجستير: درجة علمية بحثية أكاديمية وغالبا تدرسها اذا انت مبتعث من جامعة او ترغب بأن تصبح محاضر جامعي او تطور حالك لمنصب اعلى.
الزمالة: برنامج إقامة تدريبي سريري مدته من ثلاث الى 5 سنوات ينتهي بشهادة اختصاص في التخصص اللي تتدربت فيه وتصير اخصائي وهو شهادة اكلينيكية وليس اكاديمية يعني ما بتصير محاضر بس بتشتغل في وزارة الصحة او مستشفى.
البورد: امتحان تدخله بعد ما تخلص الزمالة وسنتين بعده او اكثر اسمها فلوشيب fellowship اذا نجحت فيه تاخذ شهادة البورد وحسب الدولة اللي اخذته فيها لو من امريكا تاخذ البورد الامريكي وهو الاقوى، لو كندا بورد كندي، السعودية بورد سعودي وفيه البورد العربي الأردني من Jordan Medical Council، والبورد اعلى شهادة تحصل عليها في تخصصات الطبية ومشواره طويل لكن بعد الحصول عليه رح تصير متخصص جدا في المجال.

كيف أطور من نفسي لأتمكن من الحصول على منحة؟
اتطوع ... خد كورسات اونلاين ... طور الانجليزي عندك لانه 85% من المنح بتطلب الإنجليزي وهي مهم جداا جداا للمنح ... لو تعلمت كل يوم 3 ساعات رح تنجز كثير وعندك كم هالموقع كيف اتطور من مهاراتك وخبراتك تعليمك وأكثر:-
احضر سيشن Education USA
https://educationusa.state.gov/

شوف فيديوهات ع #اليوتيوب في أي مجال بدك اتطور حالك فيه سواء مهارات او لغات او القدرات- بعض مواقع لكورسات اونلاين مجانية:

بقدم ع منح كثير وبنرفض مافي قبول شو أعمل؟
اولا القبول من عند ربنا سبحانه وتعالى ونصيب بالأول والاخير لا تيأس يعني ... لكن الشي الي ممكن تنرفض او تنقبل بسببه بنسبة كبيره جدا هي البيان الشخصي Personal Statement والي هي جزء مهم من طلب الالتحاق بالمنحة بتعكس من خلالها طموحاتك وغايتك من المنحة وغيرو. فهي بتعتبر الفرصة الأولى الك لتعكس شغفك بهالمنحة وهون بتكمن أهمية البيان الشخصي فأتعلم كيف اتطور من نفسك لتعرف تكتبها باحترافية

وتذكر انه ما هتتعلم كتابة الـPersonal Statement من أولها لازم تكتب مره ومرتين وتجرب لحد ما تحترفها

عندي مشكلة بالإنجليزي استني أتعلم وبعدين أقدم ؟
لا ... قدم من الأن والإنجليزي مافي مستوى ليفل معين توصله وتقول انا هيك تمام ... فانت هتبدأ تتعلم الانجليزي من اليوم وبنفس الوقت تقدم ع منح ...
طب شو المستوى المناسب في الانجليزي عشان انقبل في منحه؟
يكون المستوى فوق المتوسط ... المهم عند المقابلات على السكايب خاصة تفهم الي قدامك شو بيحكي وتعرف ترد عليه لتوصله رسالتك

انا تعبت من البلد وبدي اطلع ع أي مكان؟!
لو ضلت نيتك هيك اعرف انه طلبك للمنحة هينرفض غالباً ... واعرف انه كل الدول فيها الحلو والمر ... لا تفكر هتعيش حياة وردية برا بالعكس لما تخرج برا هتتبهدل صح و العيشة هناك مش رح تأخدك بالحضن مثل ما انت متخيل ولا تصدق الي بتشوفه بالصور وبيكون بالكواليس مبهدل عن تجربتي واسال اي حد جرب من قبل الغربة والعيشة برا صح شباب 😁"وأن ليس للانسان الا ما سعي" صدق الله العظيم. اسعي وضلك حاول لا تيأس ولا تفكر بتجي المنح بالسهل بالعكس و بس ينرفض الطلب لا تزعل ان شاء الله هيجيلك الاحسن منها اهم شي #الصبر

مجموعة نصائح بتساعدك كيف تتعامل مع إعلانات المنح:-
قبل لا تقدم لأي منحة، حاول تبحث عن «Eligibility Criteria» أو عوامل الأهلية، وهي الي بتندرج تحتها صفات الشخص الي يمكنه التقديم لهذه المنحة.

تذكر انه مش كل المنحة بتكون ممولة بالكامل او بتغطي جميع المصاريف؛ لهيك وانت بتقرأ بالمعلومات عن المنحة أبحث عن كلمة Award أو Scholarship أو Fund لحتى تعرف شو نوع التمويل الي بتوفرها هالمنحة كاملة او جزئية.

بتلاقي بنسبة 100% رابط للجهة المانحة بنهاية كل إعلان عن منحة، حاول أنك تدخل على موقعهم وتعرف شو نطاق عملهم قبل لا تقدم ع المنحة، وانك تكون الشخص الي بناسب هالمؤسسة.-

اذا كان عندك سؤال عن المنحة لا تتسرع وتراسل الجهة المانحة قبل ما تتأكد إجابة هالسؤال غير موجودة في الإعلان، لأنه بحالة مراسالتك الجهة المانحة لتستفسر عن أمر واجابتة موجودة بالفعل في الإعلان، بهيك رح تترك انطباع عنك مش كويس عندهم