الوصول للقمة هدف نبيل ونجاح عظيم بس مش هيكمل الا وانت قادر تحقق نجاحك في باقي جوانب حياتك الروحية والجسدية والنفسية والاجتماعية
في ناس في الحياة عايشين زي متسلقي الجبال مش شايفين قدامهم هدف غير قمة الجبل وممكن يعملوا اي حاجة عشان يوصلوا لها مش مهم الوقت والجهد في سبيل تحقيق الهدف مش مهم سابوا ايه وراهم بس المهم يوصلوا للقمة . مبدأ في ظاهره جميل ان الإنسان يحط لنفسه هدف ويقدر يوصله بس الغريب ان الناس اللي عاشت بالمبدأ ده بعد ما بتوصل للقمة وتحقق هدفها مش بتكون سعيدة يا ترى ليه؟
تخيل كده واحد تعب واجتهد وواصل الليل بالنهار عشان يحقق نجاحه العملي ويوصل لقمته و الناس بقت تتكلم عن قصة نجاحه وكفاحه .. بس و هو على القمة بص حواليه لقى أنه واقف لوحده وبص على نفسه فحس قد ايه خسر صحته عشان يوصل للقمة لأنه عمره ما اهتم بجسمه و صحته النفسية كان بياكل اي حاجة ويسهر طول الليل وينام ساعة ولا اتنين في اليوم بيشرب عدد لا نهائي من الشاي و القهوة والسجائر كان بيضغط على نفسه واعصابه لحد ما جاله الضغط وكله في سبيل ان الشغل يمشي زي ما هو عايز وطبعا معندوش وقت عشان يحافظ على روحانياته وعلاقته بربنا واكيد عمره ما فكر يسافر يهدي اعصابه ولو سافر فتليفونه مش بيسكت عشان يظبط الشغل اثناء غيابه ده بالنسبة لصحته النفسيه والجسدية ، تعالى بقى نبص على علاقاته الاجتماعية طبعا ميعرفش حاجة عن أسرته و أولاده لأن معندوش الوقت الكافي انه يهتم بيهم ويسمعلهم وصحابه زهقوا من كتر ما بيسألوا عليه وهو مش فاضي لا يقابلهم ولا حتى يكلمهم هو أه وصل لقمة الجبل بس لوحده ومش لاقي حد يحتفل معاه بإنجازه لأنه في الطريق أهمل كل شئ يعتقد انه ممكن يعطله عن هدفه فأهمل صحته وأسرته وأولاده وصحابه و الحياة عنده كانت شغل و بس .. الشخص ده عامل زي مبنى عملاق كبير بس مبني على عمود واحد .. تخيل مصيره!!!!
كتير من اللي عاشوا بالمبدأ ده هيقولوا لو معملتش كده مكنتش هوصل للي وصلتله و ان الحياة صعبة واصلا بعمل كده عشان اوفر للأولاد حياة كريمة بس ياترى هم فين الأولاد دلوقتي؟ تعرف عنهم ايه؟ ... لو سألتهم وخيرتهم ما بين وجودك جنبهم والفلوس هياختاروا ايه ؟ السؤال الأهم بعد ما وصلت للي وصلتله حسيت بالسعادة وأنت واقف لوحدك؟!!! طب حسبت مكسبك وخسارتك بعد ما وصلت و عرفت باقي لك ايه في الدنيا ؟؟
الوصول للقمة هدف نبيل ونجاح عظيم بس مش هيكمل الا وانت قادر تحقق نجاحك في باقي جوانب حياتك الروحية والجسدية والنفسية والاجتماعية هتتعب عشان تحافظ على جوانب حياتك كلها متزنة و ممكن يخلوك ابطأ في صعودك لقمتك واحيانا هتتضطر تتنازل عن فرص بس هم دول عزوتك وسندك الحقيقي فمتتخلاش عنهم لان السعادة الحقيقية لما توصل بيهم ومعاهم ويكونوا جنبك وانت على القمة
التعليقات