أسرع طريق للقمة

يا ترى إيه أفضل الطرق للنجاح والوصول للقمة ؟ الناس اللي بتصعد بسرعة جدا في وقت قصير ولا الناس اللي بتكافح وتتعب وبتاخد وقت كبير عشان توصل ؟

كل فترة يظهر حد بشكل مفاجئ و ينجح بطريقة ملحوظة جداً، وبتبقى مستغرب من سرعة الصعود والنجاح اللي الشخص ده حققها في وقت قصير جدا و طبعا بيلفت الانتباه ليه أكثر من الشخص العصامي المكافح اللي تعب سنين كتير عشان يحقق أهدافه وممكن يكون محققش نفس قدر الشهرة، وتبدأ الموازين تختل داخل عقلك وتبقى مش عارف هو إيه أسس النجاح وأفضل الطرق للوصول للقمة.

الحقيقة في طريقتين للوصول للقمة: طريقة الفقاعة (Bubble) وطريقة تسلق الجبل

طريقة الفقاعة (Bubble)

هتلاقي حد نجح واتشهر بشكل كبير جداً وفي وقت قصير أوي هتلاقيه عمل حاجة جديدة أو غير مألوفة فأثار انتباه الكثيرين وطبعاً مع انتشار السوشيال ميديا وقنوات التواصل نور ولمع جداً .

طريقة تسلق الجبل

فدي بتاخد وقت أطول ومجهود أكبر بكثير ، متبع الطريقة دي بيمشي كما يقول الكتاب وبيكون شخص مجتهد ومكافح طول حياته بينجح بس بعد جهد كبير

طب مين الأفضل في الطريقتين ألعب على الفرصة والحظ واستنى Bubble اللي هيوصلني للقمة بسرعة الصاروخ ولا أشقى وأتعب لحد ما أوصل للي أنا عايزه؟

تعالى نشوف مميزات وعيوب كل طريقة

الفترة الزمنية

طبعا كفترة زمنية الـ Bubble أقصر في الوقت من تسلق الجبل في الوصول للقمة

المهارات المطلوبة

Bubble: الذكاء في خلق الفرصة واستغلالها (التفكير خارج الصندوق)

تسلق الجبل: الصبر – الاجتهاد – المثابرة – المرونة – الالتزام - الطموح – التخطيط - ........

الاستمرارية

Bubble: الطريقة دي فيها مخاطرة كبيرة جداً لأن لو فكرت شوية في عمر ال bubble هتلاقيه قصير جداً وبعد فترة بتفرقع وتختفي ويمكن في مدة زمنية أقصر بكثير من اللي احتاجتها عشان تتملي بالهواء وطبعا عارفين لو فرقعت هيكون مصير الشخص اللي جواها ايه .

تسلق الجبل: رغم مشقة الطريق لكن لما بتوصل للقمة بتكون واقف على أرض صلبة ولو لقدر الله نزلت درجة بتقدر تطلعها تاني ولأسوأ الظروف لو وقعت للقاع فأنت خلاص بقيت عارف إزاي تقدر تطلع للقمة من جديد.

الموضوع محير في اختيار الطريقة الأفضل لأن في عصر السرعة اللي احنا فيه بنبقى نفسنا في الفرصة اللي تنقلنا نقلة كبيرة وتسهل علينا الوصول للقمة وفي نفس الوقت عايزين نفضل مستمرين على نفس قدر النجاح بس الواقع بيقول انه أكم من الناس جتله الفرصة وبعد ما كان في سابع سما نزل لسابع أرض ومحدش سمع عنه حاجة بعد كده وبرضه على الجانب الآخر ناس بتشقى وتتعب لكن نجاحها محدود جداً

طيب يا ترى الناس اللي نجحت بسرعة واستمرت على القمة عملت إيه ؟؟

تعالى نشوف مثال شهير وهو مارك زوكربيرج اللي كان الفيسبوك بالنسبة له هو Bubble اللي طار بيها للقمة واتشهر وبقى من أغنى أغنياء العالم بس لحظة كده لو قرأت في سيرته هتلاقي انه من صغره كان مهتم بفكرة التواصل بين الناس عن طريق الكمبيوتر وكان بالفعل له تجارب قبل الفيسبوك وعمل برامج للتواصل لكن استخدمت على نطاق عيلته وأصحابه، نفهم من كده أنه قبل الفيسبوك كان بالفعل بدأ يبني القمة اللي يقف عليها ، أما بقى بعد الفيسبوك فركز على زيادة عدد مستخدمي الموقع وتطوير خدماته عشان يوصل عدد المستخدمين إلى أكثر من 250 مليون شخص و تكون القيمة السوقية للفيسبوك في 2019 حوالي 577 مليار دولار.هو اشتغل على نفسه قبل الفرصة ما تيجي ولما جت استثمر فيها وقدر يكبرها

معظم اللي نجح واستمر في نجاحه استخدم الطريقتين مع بعض، يمكن الشهرة والنجاح الملحوظ مش بيبان غير لما بتيجي الـ Bubble بس لو قريت في سيرة اي حد نجح هتلاقيه بدأ في صعود الجبل من فترة ولما جتله الفرصة ( Bubble ) نقلته خطوة كبيرة في وقت قصير.

Bubble ما هي إلا عبارة عن فرصة أنت قادر أنك تخلقها عن طريق سعيك أنك تكون مميز مش إنك تكون أحسن وده هيحصل لما تكون بتسعى للابتكار في مجالك مش بس أنك تقلد القديم وتطوره لكن بأنك تعمل اللي متعملش قبل كده.

نقطة تانية هي أنه للاسف فيه ناس بتستخدم الـ Bubble بإنها تعمل أشياء مش ذو قيمة أو تافهة عشان تلفت الانتباه وممكن ده يكون محبط لكثير من الناس اللي بتتعب وتجتهد عشان تحقق شئ قيم أو على الأقل بتبحث عن نجاح شخصي، متزعلش لأن نجاحهم مش هيستمر كتير ، هو طار في الهواء بس معملش حساب اليوم اللي Bubble هتفرقع فيه

الفرصة هدية من ربنا عليك أنك تحسن استغلالها لكن مش ممكن لوحدها تبني عليها نجاح يستمر لسنين كثير قدام.

وافتكر أن كل اللي نجح واستمر في نجاحه كافح وتعب وفي نص الطريق جاتله الفرصة ( Bubble ) اللي نقلته خطوة أو اتنين أو عشرة ، عشان كده كمل في طريق كفاحك وحاول تخلق الفرصة اللي تطيرك لفوق وتميزك عن كل اللي موجود.