عايز تبقي محظوظ تابع المقالة مكتئب ويأس و مش عايز توصل ماتقراهاش,
"يارتني كنت محظوظ زيه .. لو كان عندي نص حظه كان زماني وصلت .. البنت دي محظوظة مولودة في بوقها معلقة دهب كل حاجة بتجيلها لحد عندها,..."
كل واحد فينا ليه الصاحب اللي دايما يقول الجمل دي علي طول و هو بيتفرج علي الاشخاص الناجحين في حياتهم أو حققوا حاجة كان نفس صاحبنا دا يحققها, هو مش غلطان ما هو في ناس فعلا اتولدوا و في بوقها معلقة دهب و الحظ مولود معاهم. بس دا مش معناه اننا نتهم الحظ بالكوسة,
-أيه دا يعني انا ممكن ابقي محظوظ؟ اه ممكن,
-و ممكن الحظ يجيلي لحد عندي؟ لا مش ممكن.
دماغك اديت Error؟ طب ماتزعلش انت هتروح للحظ .. و في تاكسي, -أنتي بتهزري؟ لا بكلمك بجد تعالي اوريك ممكن تعمل ايه عشان تبقي إنسان محظوظ,
خلينا نسأل نفسا هو اصلا يعني ايه حظ؟ الحظ الحقيقي مش اللي هيحصلك و لكن ايه اللي هتعمله لما يحصلك,
-انتي بتقولي ايه؟
يعني ممكن تكون محظوظ كل اللي عليك تغير تصورك للواقع كل واحد فينا مسؤول عن حظه و تقدر تخلق بيئة حواليك عشان تتخطي "عائق" الظروف, (و خلينا نبقي نتكلم عن موضوع الظروف دي في وقت تاني عشان دا موضوع يطول شرحه)
-أيوة يعني أعمل ايه؟
طول بالك عليا هقولك تعمل ايه احنا اتفقنا من البداية اننا هنروح للحظ و نقرب المسافة عليه و ممكن نتقابل في نص الطريق طب ازاااي؟ عشان يبقي عندك حظ لازم تهيأ له ارض خصبة يتوجد فيها و اهم عنصرين في الارض دي هما عنصر الفضول و اليقظة عشان تقدر تخلق لقاءات مع اشخاص في الاوقات المناسبة.
-طب ازاي اقدر اوصل للأشخاص دول و هيفيدوني بأيه؟
سحر شبكات التواصل الاجتماعي من خلالها تقدر تكون حظ و مكسب لأشخاص تانية و العكس صحيح من خلال مساعدتهم في مشاريعهم او احلامهم. و النزول لمقابلتهم في ارض الواقع
-طب انا كدة استفدت بايه أنا مش مقتنع بكلامك.
و لا يهمك يا سيدي هبسطهالك و اقنعك الحق عليا برضو اني نسيت اوضحلك اهم حاجة يكون عندك حلم عايز تحققه, في خلال مقابلاتك مع الأشخاص اللي تعرفت عليهم و بادرت بمساعدتك ليهم تقدر تحكي معاهم عن هدفك و حلمك و من هنا الصنارة ممكن تغمز و تخلق فرص ليك تجعلك احسن محظوظ في العالم. بس عشان مغشكش انت وارد انك تفشل بعد ما تلاقي الفرصة لازم تخلق من فشلك مادة خام لحلم او هدف تاني, و أقولك حاجة كمان لو انت مش محظوظ اعمل نفسك محظوظ, سكت ليه !! بكلمك جد مش زمان كانوا بيقولوا الفقر بيجيب فقر كمان الحظ بيجيب حظ هو مش انت اوقات بتبقي مش جعان و أول ما تشم ريحة الاكل او تشوفه شهيتك بتتفتح اهي نفس الفكرة طب بذمتك عمرك شوفت انسان محظوظ و كئيب و مش باين عليه الحظ ؟؟ احنا بقي هنعمل العكس احنا هنعمل نفسنا محظوظين و نفتح قلوبنا لأي مشاعر ايجابية بيحس بيها الانسان المحظوظ,
من الآخر كدة الناس نوعين ناس محظوظين بالصدفة و ناس محظوظين قصد انا هنا بقي عشان نبقي محظوظين قصد,
التعليقات
❤️❤️