كل يوم نمر بتغيير ومع كل تغيير بنقف عاجزين عن التصرف طب والحل؟ هنتكلم عن بعض الحلول اللي هتساعدنا نعدي فترات ده باقل خساير وبصحة نفسية افضل
مرينا بتغيرات صعبة في الماضي وبنمر حاليا وهنمر في المستقبل طب والحل؟
كل ما نمر بتغيير في حياتنا هنقف ونستني اما يعدي والدنيا ترجع زي الاول طب ما فيه تغييرات الدنيا مبترجعش بعدها زي الاول
خليني احكيلكم قصه وركزوا فيها وسيبكم من الافكار اللي ظهرت في دماغكوا بسبب الكام سطر اللي فوق
الانسان في اول حياته علي الارض كان معرض يهجم عليه وحوش اسد من هنا علي نمر من هناك علي انه ممكن يموت من شدة الحر او من شدة البرد هو ورزقه ومعهوش وسائل مادية زي (مسدس/بندقيه/بيت يستخبي فيه حتي) تساعده انه يواجه الخطر ده لكنه عدي كل المخاطر ده وادينا عايشين اهو
طب هو عدي كل ده ازاي؟
ببساطة عداها بالمهارة اللي ربنا خلقها في فطرتنا وهي التكيف مع التغيير كلنا مولودين ومعنا مهارة التكيف علي التغيير
طب ازاي وانا كل ما يحصل تغيير في حياتي بعطل واقف؟
هقولك ركز مع سلوك طفل لسه في شهوره الاولي وشوفه ازاي ممكن تجبله لعبه يخاف منها في الاول وبعدين يلعب بيها ويحبها وتاخدها منه يعيط شويه وبعدين ينشغل بلعبه تانية وينسي اللعبه الاولي اصلا
طب واحنا مهارة التكيف مع التغييرعطلانا معانا ليه؟
علشان المهارة اللي مبيتمش استخدمها وتنميتها بتعطل وعلشان للاسف كتير من التربية مش بتنمي المهاره ده زائد اما بنكبر بنهرب للروتين وبنخاف نخرج من منطقة الراحة بتاعتنا بمزاجنا لحد ما تيجي الظروف وتخرجنا منها غصب عنا
طب وننمي المهاردة ده ازاي؟
خليني اقولك معلومة وبعدين اقولك تنميها ازاي
اما بنتعرض لاي تغيير مفاجئ فيه جزء في الدماغ اسمه الجسم اللوزي بيشتغل والجزء ده بيبقي مسؤول عن الاستجابات السلوكية الخاصة بالخوف والقلق ووظيفته اصلا انه بيحدد المحفزات اللي ممكن تهدد حياة الانسان
طب والمعلومة ده هتفدني في ايه؟
هتفديك فانك تعرفي أن اول ما بتتعرض لتغيير مفاجئ الجسم اللوزي هو اللي بشتغل مش التفكير المنطقي والجسم اللوزي استجابته ياما هروب ياما هجوم فمحتاج اتعامل مع الجسم اللوزي واخليه ويهدي علشان التفكير المنطقي يشتغل واعرف اشوف هعمل ايه في التغيير ده
ومن هنا هنوصل لسؤال ازاي انمي مهارة التكيف مع التغيير:-
(1) اول ما يحصل تغيير مفاجئ استخدم مهارة تشتيت الانتباه ابدا مارس حاجه تبعد تفكيرك عن التغيير اللي حصل علشان الجسم اللوزي يهدي ويحس ان مفيش خطر ويدي فرصه لتفكير المنطقي يشتغل بس مهم استخدم مهارة تشتيت الانتباه في حاجه ايجابيه زي مشي- تلوين- قراءة- تمارين تنفس
مش في حاجه سلبيه زي الاكل الكتير- العصبية والزعيق- النوم الكتير- شرب الكافيين بكميات كبيره
(2) تقبل أن الثابت الوحيد في الحياة أنها متغيره
(3) حدد مشاعرك وقت التغيير- حاسس بايه؟- ايه اللي خايف انه يحصل؟- ايه اللي خايف تفقده؟- ايه اللي محسسك بمشاعر ضيق؟ الخ
(4) اتكلم عن المشاعر الخاصة بفترة التغيير مع حد بترتاحله او مع حد متخصص لو حسيت انك محتاج ده
(5) حدد التغيير حاصل في اي جانب من جوانب الحياة وهياثر علي جوانب تانيه ولا لا ؟
(6) فكر نفسك أن فيه جوانب تانية ثابته ممكن تستمتع بيها
(7) امسك ورقه وقلم واكتب ايجابيات وسلبيات التغيير اللي حصل
(8) فكر ازاي تستفاد من الايجابيات
(9) فكر ممكن تقلل من تاثير السلبيات ولا لا
(10) ارضا عن ربنا وافتكر ما اصابك لم يكن ليخطائك وما اخطائك لم يكن ليصيبك
(11) كل فترة اخرج بره منطقة الراحة علشان اما يجي التغييرالمفاجئ تكون المهارة شغاله وكل حاجه تمام
التعليقات