عزيزي القارئ.لربما تمر عليك لحظات ضعف كباقي البشر و أحياناً تكون عرضة لفقدان الشغف و وصولك هنا يعني هذه إشارة لك لتأخذ نفس عميق وتبدأ من جديد..اقرأ💚
من فترة سألت في quora عن ايه اللي بيخلي بعض الناس متقدمة وناجحة في حياتها وبعض الناس عادية؟
_ كانت الإجابة متقسمة لحاجتين:
أول حاجة ناس اتكلمت عن النجاح عامة و حد منهم قال إنه أهداف وغايات محددة،وجهة معروفة،قرارات حازمة ،خطة استراتيجية محددة...
و حد تاني قال اتباع قانون الجاذبية،صبراً لا يتزعزع، والثقة بالله مع التصميم.
و حد تالت قال "يرى الاشخاص الناجحون العالم بشكل مختلف. فهم يستفيدون من الفرص الجديدة التي يمنحها لهم العالم. ويستمتعون لأصواتهم الداخلية وعدم الاستسلام دائماً و يركزون على الأشياء الإيجابية التي تحدث في حياتهم. لأن النجاح يجذب النجاح".
تاني حاجه ناس حكت قصص منها واقعية و منها خيالية بس ليها مغزى:
_حد حكى قصة أن والده حكاله قصة كالآتي:
مزارع قرر حفر بئر كان بيعلم إنه إذا حفر 100 قدم هيصل للمياه الجوفية (وده كان هدفه).
بدأ وحفر 20 قدم. وفوجئ إنه شاف رمال جافة و صخور ،خاب أمله و استسلم .
وحفر في مكان تاني. المكان التاني ده حفر 20 قدم. وواجه نفس الطبقة الرملية الجافة فاستسلم.
وحفر فمكان تالت ولقى نفس المشكلة.
بحلول نهاية اليوم كان حفر في خمس مناطق مختلفة. كل واحدة 20 قدماً. وما نجحش واستسلم. في حين إن مجموعهم ال5 كان 100 قدم.
لو كان حفر وكمل في نفس أول مكان كان ساعتها هيوصل لل 100 قدم وهينجح في الوصول لهدفه إنه يبني بئر.
المغزى من القصة / جهود مخلصة و متسقة + انضباط= وصول.
_ شخص تاني قال قصة واقعية وهي:
لما كان بيدرس في البكالوريوس كتب حوالي 15 مدونة(أبحاث)
كل واحدة منها من 80 الى 100 صفحة على مدار 3 سنوات.
كانت مهمة شاقة لأنه في نفس الوقت كان بيدرس CA بجانب منهجه في الكلية. كان معتاد كل يوم بيروح للكلية من الساعة 8 للساعة 12 الضهر. بعدها بيحضر فصول CA من الساعة 2 الى 8 بليل.
في أول سنة لما بدأ يكتب الأبحاث قرر إنه يكتب 10 صفحات في اليوم عشان يوصل لهدفه المحدد.
ومع الوقت اتوسع في الكتابة وزود صفحة إضافية. لحد ما انتهت المدة وانتهى من الكتابة. وكمان كان عنده وقت إنه يزود مراجع. بينما أصدقائه واجهوا صعوبات و مقدروش يكملوهم وسخرو منه و مصدقهوش لما قال" الأمر كان سهلاً للغاية".
المغزى من قصته" قطرات صغيرة تصنع محيط".
عشان توصل للهدف اللي انت عايزه لازم تستفيد من مغزى القصتين دول و افتكر جملة العجوز في رواية الخميائي أما قال:
( عندما تريد شيئاً ما حقا فإن الكون بأسره يطاوعك على تحقيق رغبتك).💚
التعليقات
هل عندما يقطع الشخص شوط طوييييل و يحتاج يوقف معناه انه لازم يستمر و يجدد شغفه ولا يسمع احساسه و يوقف الى ان يرجع الشغف؟