مبدأيا عشان تكتب محتوى متوافق مع قواعد السيو لازم في البداية يكون عندك القدرة علي الكتابة بشكل عام، يعني تعرف تعبر عن فكرة وتشرحها بشكل منظم وجذاب،
مبدأيا عشان تكتب محتوى متوافق مع قواعد السيو لازم في البداية يكون عندك القدرة علي الكتابة بشكل عام، يعني تعرف تعبر عن فكرة وتشرحها بشكل منظم وجذاب، ولازم يكون عندك القدرة علي التقصي والبحث عن معلومة وترتيب أفكارها في مسودة مبدئية بسرد منطقي، يراعي تسلسل بناء الفكرة.
لو لقيت ان عندك الموهبة دي، مبروك انت مؤهل لتعلم الكتابة لخدمة ظهور المقال في محركات البحث، لو مش عندك الموهبة فأنت محتاج تتعلم أسس وقواعد الكتابة وبعد كده تتعلم كيفية توظيف اللي اتعلمته في الكتابة بما يتوافق مع قواعد السيو.
المقال المتوافق مع السيو بيتكون من ٧ عناصر:
١. الكلمة المفتاحية الرئيسية:
الكلمة المفتاحية الرئيسية هي الكلمة اللي لما الزائر يبحث بيها بيظهر المقال الخاص بيك من خلالها في محرك البحث، كل كلمة بيكون عليها منافسة تتناسب طرديا مع حجم البحث عن الكلمة وسعر النقرة علي الاعلان للظهور في البحث عن الكلمة دي.
الكلمة دي بيتم وضعها بشكل مباشر وصريح في عنوان المقال، وبيتم اختيار قوتها بناءا علي قوة الموقع الخاص بيك، يعني لو الموقع قديم ومدعوم بعدد كبير من الباكلينك وبيظهر بشكل كويس تقدر تنافس علي كلمات متوسطة أو صعبة، لو الموقع حديث نسبيا بيتم اختيار كلمات سهلة long tail keywords.
طيب أنا هعرف ازاي مدى صعوبة الكلمة المفتاحية الرئيسية؟ تقدر تعرف دا من خلال ادوات مجانية زي keyword planner الخاص بجوجل ادز او من خلال أدوات مدفوعة زي semrush و ahrefs و kwfinder (ويفضل تشيك علي الكلمة دي في كل الأدوات عشان توصل لفكرة أوضح).
٢. الكلمات المتعلقة:
ودي علي الرغم من أهميتها الكبيرة الا إن كثير من الكتاب ومختصي السيو بيهملوها، و الكلمات المتعلقة بكل بساطة هي كلمات أساسية بسيطة بيعتمد عليها الذكاء الصناعي في جوجل عشان يحدد اذا كان المحتوى الخاص بالمقال بيحقق الهدف من البحث وبيشبع حاجة الزائر ولا لأ؟
بيحدد من خلالها هل مقالك ذو قيمة وبيغطي كل جوانب الموضوع ولا لأ، وخلي بالك ان فيه خيط رفيع جدا بين كل كلمة مفتاحية والتانية من حيث الكلمات المتعلقة حتى لو كانوا متشابهيين تماما يعني لو هتكتب مقال عن قواعد الشطرنج هيكون فيه كلمات متعلقة مختلفة تماما عن تاريخ الشطرنج.
"قواعد الشطرنج" يبقى ضروري يكون مذكور في المقال كلمات زي: رقعة، حركة، كش، فيل، وزير، حصان، بيدق، أمام، وراء، قطري، عمودي، كش مات، تعادل ..... الخ.
"تاريخ الشطرنج" يبقي الذكاء الصناعي في جوجل هيدور في المقال بتاعك عن كلمات زي: بطل العالم، تطور اللعبة، منشأ، انتشار، بطولة العالم، أفضل لاعب، بول مورفي، جاري كاسباروف، بوبي فيشر، تواريخ فاصلة في اللعبة .... الخ.
الكلمات المتعلقة دي ضروري تواجدها في المقال عشان جوجل يعتمد المقال بتاعك مبدأيا كقطعة محتوى غني ويبدأ يظهر بشكل جيد في الكلمة المفتاحية الرئيسية.
٣. كلمات مفتاحية فرعية:
المقال المحترم مش بيظهر في نتيجة بحث واحدة بس ولكن بيظهر في عشرات ومئات الكلمات الأخرى، بعضها هيكون مخطط ليه والبعض الأخر هيظهر بشكل تلقائي بلا ترتيب مسبق نتيجة لقوة المقال.
الكلمات دي هتلاقيها في خانة عمليات البحث ذات صلة هتاخد كل كلمة فيهم وتعملها عنوان لفقرة غنية قوية بتعالج الجزئية دي بشكل شامل ويفضل انك تقسم الفقرات الخاصة بالمقال لأجزاء بسيطة ونقاط عشان يبقى عندك فرصة كويسة أن المقال الخاص بيك يظهر كمقتطف مميز (أي مقال في الصفحة الأولى عنده فرصة يظهر كمقتطف مميز).
٤. الأسئلة المتعلقة بالموضوع
جزئية الأسئلة دي مهمة جدا وهتساعد مقالك يوصل لعدد كبير جدا من الزوار علي محرك البحث وجوجل هياخد عن مقالك فكرة كويسة وهيعتبره مقال غني بيخدم غرض البحث.
هتلاقي في أغلب عمليات البحث خانة اسمها: " أسئلة طرحها الأخرون" هتاخد كل سؤال وتجاوب عليه بشكل مختصر وواضح ومباشر ويفضل تجاوب عليه في نقاط بسيطة لو الأمر يستدعي.
٥. الصور:
جوجل بيحب المقال المدعوم بصور توضيحية لأنه بيثري الموضوع وبيبين انه مقال مخدوم كويس وبيقدم فايدة حقيقية.
٦. الفيديوهات:
لازم تضمن فيديو او ٢ في كل مقال حتى لو الفيديو دا مش خاص بيك ( يفضل انك تعمل قناة خاصة بيك علي اليوتيوب عشان تثري البراند بتاع الموقع).
٧. المصادر:
المصادر مهمة جدا ولا تقل أهمية عن الفيديوهات والصور التوضيحية.
- توزيع الكلمات المفتاحية.
للأسف الفكر الشائع عند أغلب العرب ان الظهور في الكلمات المفتاحية بيعتمد علي التكرار، كل ما تذكر الكلمة أكثر كل ما ترفع النتيجة الخاصة بيك في جوجل والكلام دا كان زمان جدا للأسف ولكن حاليا جوجل طورت أدوات الذكاء الصناعي لفهم مضمون المحتوى وهل هو بيخدم البحث ولا لأ.
الكلمات المفتاحية الرئيسية بيتم ذكرها داخل الفقرات بصورة طبيعية وبسيطة بدون حشو ولا تكرار ممل (جوجل حاليا بيفهم المحتوى بشكل ممتاز يقارب الفهم البشري).
في المقابل لو كررت الكلمات المفتاحية بشكل كبير مبالغ فيه هيتحول المقال بتاعك لمقال سبام مزعج للقارئ ويستدعي في أسوأ الظروف عقوبة من جوجل.
- الكتابة بلغة عربية سليمة، بشكل مباشر، منظم، واضح، وبترتيب سلس بيساعد بشكل كبير في رضاء الزائر عن مقالك واللي بالضرورة بيترجم عند جوجل كمؤشر جودة في قطعة المحتوى الخاصة بيك.
- تقديم معلومة صحيحة، حقيقية، صادقة، وحديثة من أهم عوامل توافق المقال مع محركات البحث، ضروري انك تحدث المحتوى الخاص بموقعك باستمرار بكل المعلومات الجديدة يعني مثلا لو كنت كاتب مقال عن كواكب المجموعة الشمسية وذاكر انهم ٩ كواكب في حين ان التحديث الأخير بيقول انهم ٨ بس بعد استبعاد بلوتو ككوكب تاسع هيتم اعتبار المقال بتاعك غير مؤهل لخدمة نتيجة البحث لأنه بيقدم معلومة قديمة وغير حقيقية، وقتها المقال بتاعك هيسقط حتى لو متصدر.
الكتابة للسيو سهلة جدا لو التزمت بالمعايير الصحيحة وفي نفس الوقت ممكن تسبب مشاكل كتير لو تمت بشكل سيء.
التعليقات