كن حذراً وأنت تتجول في ذاكرتك..فبعض الزوايا لا يستطاب دخولها ولا حتي ذكرها من جديد.
ايه ممكن يخليك لحد دلوقتي محتفظ بحاجات وأفكار وناس ممكن تسببلك إزعاج وتعب أو إحساس مفرط بالذنب ممم طيب إقرأ الجملة دي الأول وتعالي نكمل بعدها كلامنا..
قال باولو كويلو الروائي البرازيلي " كن حذراً وأنت تتجول في ذاكرتك.. فبعض الزوايا لا يستطاب دخولها ولا حتي ذكرها من جديد.. "
طيب نفكر سوا..
هو إنت مش خلاص إتصرفت غلط في موقف معين وخلاص الناس دي دخلت حياتك فعلاً ولا لسه هاتتصرف أو هاتتعرف؟
طيب أفكارك ومعتقداتك دي مش كذا مرة وقعتك في غلط؟
انا شايفه إن كل إجاباتك (أيوه) ..
طيب إيه رأيك نحاول نتخلص من أفكارنا الغلط اللي سببتلنا مشاكل ..ونستغني عن حاجات مضايقانا
ونتخلي ونبعد عن ناس بتزعجنا وبتإذينا؟! ..تصرفاتك زمان وأخطائك وحماقاتك ( شفتوا حماقاتك دي)
ومعاهم شويه ناس دخلوا لخبطوا حياتك..كل دول كانوا نتيجة لخبرتك وتجاربك البسيطة جداً اللي كانت يدوب تتيح ليك التصرف بالطريقة دي
ويمكن كمان بسبب سنك الصغير وإفتقادك لتوجيهات ورأي حد قريب منك موثوق فيه وتفكيرك كمان الغير ناضج كان ليه دور...
يعني اللي حصل كان وارد يحصل ولازم يحصل.. عشان مع الوقت تعرف من الغلط ده ايه هو الصح وعشان لما تقابل الناس الصح تحس بقيمتها
يعني إنت + أفكار غلط +ناس غلط + تصرفات غلط = إنت +تجارب+خبرات +تصرفات صح واختيارات صح...
المعادلة سهلة يعني هاتبقي إنت التاني لما تعدي بمراحل إنت الأولاني...
يبقي كفاية بقي تفكر في حاجات..فاتت وناس راحت ..وأفكار ضيعت مننا فرص كتير.. اعمل unsave لكل ده أو delete من مخك خااالص
وادخل على properties دماغك واعمل تعديل لكل اللي ماكانش عاجبك زمان..
وافتكر الجملة دي كمان للكاتب والمخرج وودي آلن.. "نحن بحاجه لشجاعة الحذف.. حذف التفاصيل حذف الماضي حذف الرسائل حذف الأصوات حذف الحنين وحذف بعض الأشخاص أيضاً"
انسي.. اتعلم..وابدأ من جديد
التعليقات